സരോദ്

സരോദ്
നിലാവുള്ളൊരീ രാത്രിയിൽ
നീയുസ്താദിനെ വായിക്കുക

ആ മിനുസനഖങ്ങളിലെ
സ്വരചിത്രങ്ങൾ വെളിപ്പെടുത്തുക
ആ വിരൽത്തുമ്പിലെ തേങ്ങലുകൾ
ഉച്ചത്തിലാക്കുക

സരോദ്
സമയത്തെ നേർത്ത കുമിളകളായ് പറത്തി
നീയുമുസ്താദും യാത്ര തുടരുക

രബീന്ദ്രഗ്രാമരാഗങ്ങളിൽ
അമീർ ഖുസ്റോവിൻ തരാനകളിൽ
അവന്റെയാദിനാദം
കണ്ടെടുത്തു കൊടുക്കുക

സദസ്സിലോരോ മനസ്സും
സരോദുകളാവുന്നതറിയാതെ
നീ സരോദ് വായിച്ചുകൊണ്ടേയിരിക്കുക